CENTRO NACIONAL CHEGA! ESTABELESE ONA FORMULÁRIU UNIKU HODI HALIBUR DADUS KONA-BA VÍTIMA SIRA.

Liquiça, loron 03 Abríl 2019 – Maizumenus ema hamutuk 300 halibur iha salaun Centro Tokodede Liquica hodi komemora tinan 20 masakre Liquica. Partisipa mós iha eventu ne’e, Diretór Centro Nacional Chega! I.P Sr. Hugo Maria Fernandes ne’ebe hola parte hanesan oradór iha semináriu loron da uluk hodi fahe informasaun kona-ba Papél Centro Nacional Chega! nian ba luta diretu vítima no sobrevivente sira.
 
Director Hugo esplika katak lei Direitus Umanus Internasionál hateten katak estadu mak responsabiliza ba violasaun direitus umanus maibe lei Kriminál Internasionál no lei Humanitariu Internasionál hateten katak responsabilidade ba asaun violasaun diretus umanus, ne’e responsabilza husi individu ne’ebe komete violénsia. Nune’e CAVR adopta prinsipiu tolu ne’e iha nia relatóriu no rekomendasaun sira.
 
“Parte sira husi justisa tranjisional maka direitu atu hatene lia-loos, direitu ba justisa, reforma institusional, no reparasaun. Maibe too agora, governu seidauk iha baze de dadus kona ba sobrevivente ka vítima sira.” Tenik Sr. Hugo “Aleinde ne’e, seidauk mosu iha polítika governu nian ne’ebé ko’alia kona ba vítima husi krime pasadu nian no to’o agora seidauk iha rejime espesiál tratamentu saúde ba vítima sira.”
 
Nia hatutan katak Centro Chega! estabelese ona formuláriu úniku ne’ebé sei uza hodi halibur dadus kona-ba vítima sira. Centro Chega! mós prodús (hakerek) ona polítika apoiu fundu ba sobrevivénsia sira ne’ebé vulneravel liu no polítika ida ne’e ko’alia mós kona ba oinsá mak apoiu sira ne’e iha nia valor sustentabilidade.
 
Iha biban ida ne’e Diretór Hugo mós hateten katak komemorasaun masakre sira hanesan modelu ida hodi dignifika no fó rekoñesimentu ba vítima sira. Diretór Hugo mós enkoraja vítima nia oan sira atu tulun hakerek inan aman sira nia memória atu nune’e bele halo balansu narativu ba ita nia istória luta nian, tanba luta ida ne’e luta popular ne’ebé involve ema hotu nia partisipasaun.
 
Antes remata aprezentasaun, Diretór Hugo fó apresiasaun ba Prezidente Repúblika, ba Primeiru Ministru no ministériu relevante sira ne’ebé mak kontinua fó ona apoiu ba Centro Chega! nia servisu.