PROFESÓR ESKOLA ENSINU BAZIKU NO SEKUNDÁRIU KUAZE NA’IN 40 HALO VIZITA MAI CENTRO CHEGA!

Dili, loron 23 Abríl 2019, Profesór Eskola Ensinu Baziku no Sekundáriu kuaze na’in 40 husi Munisipiu haat hanesan Aileu, Dili, Ermera no Liquiça halo vizita mai Centro Nacional Chega! iha Antigo Comarca Balide – Dili, hodi haree espoziasaun, sela detensaun no arkivu sira.
 
Vizita ne’e fasilita husi UNESCO Timor-Leste ne’ebé ho objetivu atu introdúz sítiu istóriku ba profesór no sai referénsia ba sira atu hatutan ba estudante sira iha eskola ida-idak ne’ebé sira reprezenta ba.
 
Molok halo vizita ba espozisaun, sela detensaun no arkivu, profesór sira akompaña uluk video Introdutóriu Centro Chega! nudár introdusaun ba profesór sira kona-ba knar no responsabilidade sira ne’ebe atribui iha dekretu lei No.48/2016.
 
Iha vizita ne’e, Diretór Ezekutivu Centro Chega! Sr. Hugo Maria Fernandes mós halo nia intervensaun hodi introdúz programa xave Centro Chega! inklui sítiu istóriku sira ne’ebe Centro Chega! koleta ona liu husi peskiza ne’ebé Centro Chega! halo iha tinan 2018.
 
Alende ne’e, Diretór Ezekutivu mós kontinua enkoraja profesór sira atu lori estudante sira mai vizita Centro Cehga! no mós sítiu istóriku sira iha Dili. Ikus liu,  Diretór Ezekutivu entrega Livru Relatóriu Chega! ba reprezentante profesór husi munisipiu ida-idak nudár referénsia hodi introdúz ba estudante sira iha eskola sira. Vizita tuir mai sei hala’o iha fulan hirak tuir mai, bazeia planu vizita regulár ne’ebé UNESCO Timor-Leste planeia ona.